.png){kind=small}
VENTONOSO
Optimización do autoconsumo: ferramentas para unha xestión eficiente das instalacións renovables
Nos últimos anos, o autoconsumo enerxético —especialmente a través de instalacións fotovoltaicas— experimentou un crecemento significativo na provincia da Coruña. Cada vez máis fogares apostan por producir a súa propia enerxía, reducir a factura eléctrica e contribuír á transición cara a un modelo enerxético máis sostible.
Porén, contar cunha instalación renovable non garante por si soa un aproveitamento óptimo. Moitas persoas usuarias descoñecen como interpretar os datos de produción e consumo, identificar ineficiencias ou aplicar hábitos cotiáns que melloren o rendemento do seu sistema. Para dar resposta a esta realidade xorde o proxecto “Optimización do autoconsumo: ferramentas para unha xestión eficiente das instalacións renovables”, impulsado pola asociación VENTONOSO.
Un proxecto pensado para a cidadanía
O obxectivo principal da iniciativa é mellorar a capacidade da cidadanía para comprender, xestionar e optimizar as súas instalacións de autoconsumo, especialmente no ámbito doméstico. A través de ferramentas prácticas e accesibles, VENTONOSO busca facilitar que as persoas usuarias aproveiten ao máximo a enerxía que producen, reducindo a dependencia da rede eléctrica e promovendo un consumo máis consciente e responsable.
O proxecto está dirixido á poboación da provincia da Coruña, tanto en contornos urbanos como rurais, e pon o foco en fogares e pequenas explotacións que xa contan con instalacións renovables e desexan mellorar o seu funcionamento.
Ferramentas
A iniciativa estrutúrase arredor de varias accións complementarias:
-
Elaboración dun Manual básico de autoconsumo, redactado en linguaxe clara e accesible, que explica de maneira sinxela o funcionamento das instalacións, a interpretación das curvas de produción e consumo e as principais estratexias para optimizar o rendemento enerxético.
-
Material divulgativo visual, que recolle de forma resumida as boas prácticas máis importantes para aplicar no día a día.
-
Sistema de asesoramento individualizado, dispoñible en modalidade presencial, telefónica e en liña, que permite analizar casos reais, resolver dúbidas concretas e ofrecer recomendacións adaptadas a cada fogar.
-
Xornadas de sensibilización e formación, cun enfoque práctico e participativo, nas que se abordan aspectos clave da xestión enerxética doméstica.
-
Campaña de comunicación en web e redes sociais, con contidos divulgativos, infografías e consellos prácticos para ampliar o alcance do proxecto.
Compromiso coa transición enerxética
Con este proxecto, VENTONOSO reafirma o seu compromiso coa protección do medio ambiente, a loita contra o cambio climático e o acompañamento á cidadanía no proceso de transición enerxética. Optimizar o autoconsumo permite non só mellorar o rendemento das instalacións existentes, senón tamén avanzar cara a un modelo enerxético máis xusto, eficiente e adaptado ás necesidades reais do territorio.
As persoas interesadas en participar nas actividades formativas ou no sistema de asesoramento poden informarse a través das oficinas de VENTONOSO na provincia da Coruña ou mediante os canais habituais da entidade.
Actividade subencionada pola Deputación da Coruña.
